சொல்லத் துணிந்தவை – 7 || எழுத்து: அம்மு ராகவ்

1 0
Spread the love
Read Time:12 Minute, 30 Second

மாற்றம் நம்மிலிருந்து தொடங்கட்டும்

கேன்சர், ஹார்ட் அட்டாக், ஆடிசம் என்று பார்க்கும் பத்து பேரில் 9 பேர் அவர்களுக்கோ, தெரிந்தவர்களுக்கோ மேலே சொன்ன பிரச்னைகள் இருக்கிறது என்று சொல்கிறார்கள்.

எங்கும் கெமிக்கல், எதிலும் பூச்சிக்கொல்லிகள், எல்லாவற்றிலும் கலப்படம். இதனாலே இவ்வகை நோய்கள் பெருகிவருவதாக நாமே நிறைய படிக்கிறோம், பயந்துபோகிறோம்.

காய்கறிகளில் அடிக்கப்படும் பூச்சிக்கொல்லிகள் தாய்ப்பால் வரை கலந்துவிட்டது.

என்ன செய்வது?

யாராவது பூச்சிக்கொல்லி, ரசாயன உரங்கள் போடாமல் காய்கறிகளோ, பழங்களோ விளை வித்துத் தருவார்களா?

தருவார்கள். அந்த விலை உங்களுக்குக் கட்டுப்படியாகுமா?

இல்லை. எனில், கூழுக்கும், மீசைக்கும் ஆசைப்பட்டால் எப்படி?

என்னதான் செய்வது?

சின்ன மாற்றங்களிலிருந்து நாம் தொடங்கும்போது பெரிய மாற்றங்கள் தானே நிகழும் தானே?

மாடித் தோட்டம், பால்கனித் தோட்டம்.

இப்பொழுது அப்பார்ட்மெண்ட் கல்ச்சர். நகரமயமாதல் கையளவு மண்ணைக்கூட விட்டு வைக்காத வீடு கட்டும் பாணிகள் என்றாகிவிட்டபோது, ஒரு சின்ன வீட்டுத் தோட்டம் வெயில் வரும் இடத்தில் அமைத்தால் நமக்கான கீரைகள், பூக்கள், காய்கறிகள் நாமே விளைவிக்க முடியாதா என்ன?

‘கேக்க நல்லாத்தாங்க இருக்கு, ஆனா எப்படி பண்றது? கட்டடத்திற்கு எதாச்சும் பாதிப்பு வருமா? உண்மையில் இது சாத்தியமா?’

இதுபோன்ற தோட்டங்கள் அமைப்பதில் நிபுணரான ஆரண்ய அல்லி அக்காவிடம் கேட்கலாமா?

ஆரண்ய அல்லி அக்கா சேலத்தில் வசிக்கிறார். பெர்மா கல்சர் முறையில் தோட்டம் அமைத்துக் கொடுப்பது இவருடைய தனித்தன்மை.

சேலத்தில் மட்டுமே சுமார் 500 பேர்களுக்கு மாடித் தோட்டம் அமைப்பதற்குப் பயிற்சி அளித்திருக்கிறார். குறிப்பிடத்தக்க அம்சம் கற்றுக்கொண்ட அனைவருமே அதைச் செயல்படுத்தி தங்கள் வீட்டிற்கான கீரைகள், காய்கறிகள் அனைத்தையும் தாங்களே, தங்கள் மாடித் தோட்டத்தில் விளைவித்து நஞ்சில்லா உணவு முறையின் ஒரு பகுதியைச் செயல்படுத்தி இருக்கிறார்கள். அவருடனான சமீபத்திய உரையாடலை இங்கே தொகுத் திருக்கிறேன்.

கோவிட் பெருந்தொற்றுக் காலத்தில் ஊரடங்கு, பொருட்கள் வாங்கக் கட்டுப்பாடுகள் இருந்த காலகட்டத்தில் இதுபோன்ற மாடித் தோட்டங்கள், அதை அமைத்தவர்களுக்கு பெரும் வரப்பிரசாதமாக இருந்திருக்கிறது.

காய்கறி விலை ஏற்ற இறக்கம், அது ஆர்கானிக்கா, கோல்ட் ஸ்டோரேஜிலிருந்து வந்ததா? பச்சைப்பசேலென்று பூச்சி தாக்காமலிருக்க ரசாயனத்தில் குளிப்பாட்டப்பட்டதா என்ற கவலைகளோ, சந்தேகங்களோ இல்லை. தங்கள் கண்முன்னே வளர்ந்த கீரைகள், காய்கறி கள், பூக்கள்.

பால்கனிதான் இருக்கிறது?

அதனால் என்ன? பாபிலோனின் தொங்கும் தோட்டத்தைப் போல அழகாகச் சிறு சிறு க்ரோ பேக் பைகள் மூலம், ஊஞ்சல் தோட்டத்தை அமைக்க முடியும், தேவை வெயில் படும் இடமாக இருந்தால் போதும். கீரைகள், தக்காளி, பூக்கள் எல்லாம் எளிதில் வளர்க்க முடியும். மண்ணுக்கு எங்கே போவது?

கோகோபித் எனப்படும் தென்னை நார்தான் மண்ணுக்கு மாற்று. இது எடை குறைவு, நீரை நீண்ட நாட்கள் பாதுகாக்கும், காற்றோட்டம் வேர்களுக்குக் கிடைக்கும், மண் புழு உரமும், சிறிது செம்மண்ணும் சேர்த்தால் போதும், இதில் நீங்கள் தூவும் விதைகள் வளர்வதை எதுவும் தடுக்க முடியாது. அந்த அளவிற்கான அற்புத விளைச்சல் கிடைக்கும்.

செடிகளில் ஊற்றப்படும் தண்ணீரால் பில்டிங் பாதிப்படையுமா?

எவ்வளவு அப்பாவித்தனமான கேள்வி இது? மழைக்காலங்களில் நம் வீடு நனையாமல் இருக்க குடையா பிடிக்கிறோம்? ஏகப்பட்ட ரசாயனங்கள் உபயோகித்துப் பயன்படுத்தும் சோப்பில் தினம் நாம் குளிக்கும் பாத்ரூமால் நம் வீடு இடிந்துவிடுமென்று நாம் நம்ப மாட்டோம் என்றால், ஒரு சிறிய செடிப்பையில் வழியும் நாலு சொட்டு நீரை எப்படி வில்லனாக்க முடிகிறது?

நாம் குடம் கணக்கில் நீர் ஊற்றப் போவதில்லை. தேவையான அளவிற்கான நீர் மட்டுமே சீரான அளவுகளில் செடிகளுக்கு விடப்போகிறோம். உரமாக இருப்பதோ தென்னை நார், அது நீண்ட நாட்களுக்கு ஈரத்தன்மையைச் சேகரித்து வைத்துக்கொள்ளும். எனவே அந்தக் கவலையே தேவையற்றது.

பால்கனி வேண்டாம், நல்ல மொட்டை மாடி இருக்கிறது என்றால்?

இன்னும் சிறப்பு. கேரளாவில் ஒரு பெண்மணி மாடித்தோட்டத்தில் நெல் வளர்க்கிறார். 50 தொட்டிகளில் நெல் வளர்த்து அறுவடை செய்கிறார். தன் குடும்பத்திற்கான அரிசி தேவை இதிலேயே அவருக்குக் கிடைத்துவிடுகிறது. நெல் வளர்த்த பெண்ணிற்கு மற்ற செடிகள் வளர்ப்பதா கடினம்? காய்கறிகள், பூக்கள் என்று ஒரு சிறிய வீட்டின் மொட்டை மாடியில் அவர் நிகழ்த்தி இருப்பது நானெல்லாம் வெறும் ஹவுஸ் வொய்ஃப் டி.வி. சீரியல், சோஷியல் மீடியா இதைத் தவிர்த்து எனக்கென்ன தெரியும் என்று சோர்ந்து நேரம் போக்கும் பெண்களுக்கு ஒரு பெரிய வாழ்க்கைப் பாடம். செய்து பார்த்தால் தெரியும் எத்தனை பணம் மிச்சமாகிறது என்று.

என்னவெல்லாம் வளர்க்கலாம்?

எதை வேண்டுமானாலும் வளர்க்கலாம். வளரும் சூழ்நிலை கிடைத்தால் தாவரம் தன்னை அதில் பொருத்திக்கொண்டு பெருகும்.

உங்கள் வீட்டின் சமையலறையில் இருக்கும் விதைகள் கூடப் போதுமானது. கடுகு, வெந்தயம், கடையில் நீங்கள் வாங்கிய வெங்காயம், சேப்பங்கிழங்கு என்று எதை வேண்டுமானாலும் நீங்கள் வளர்க்க முடியும். அடிப்படை ஞானம் போதும்.

சில காய்கறிகள் வளர்ந்து காய்க்க நீண்ட நாட்கள் ஆகிறதே?

இதுதான் நம்மிடம் இருக்கும் ஆகப்பெரிய குறை. ஒவ்வொரு செடியும் வேர் முதல் இலை வரை பயனுள்ளதுதான்.

உதாரணமாக, பூசணி வளர்க்கவேண்டும் என்பது உங்கள் ஆசை. மாடியில் அதற்கான இடம் குறைவு, வளர்ந்து காய்க்க வாய்ப்புண்டா தெரியாது. அதனால் என்ன? அதன் இலைகளைப் பொரியல் செய்யலாம். பூசணி மட்டும் இல்லை, தும்பைச் செடிகள் கூட கீரைகள்தான். கொங்கனி சமையலில் தும்பைச் செடியின் இலைகள், கருணைக்கிழங்கு இலைகள், மஞ்சள் செடியின் இலைகள் என்று இலைகளே நமக்குப் போதுமானவை. கற்றாழையில் கூட குழம்பு வைக்கலாம் தெரியுமா? கடையில் வாங்கிய வெங்காயத்தை நட்டு வைக்கிறீர்கள், வளர்ந்து வெங்காயம் எடுக்கும் அளவிற்குப் பொறுமை இல்லையா, வெங்காயத்தாள் கிடைக்குமே? சூப் முதல் பல சமையலுக்கு அது பயன் தரும்? கொஞ்சம் யோசித்தால் பல சமையல் ஐடியாக்கள் நமக்குக் கிடைக்கும்.

ஆச்சரியமாக இருக்கிறது,  நஞ்சினைக் கொட்டி விளைவிக்கும் நவீன விவசாயத்தில் மிகப்பெரிய புரட்சியைச் செய்து கொண்டிருக்கிறார் ஆரண்ய அல்லி.

ஆமாம். நஞ்சென்றால் சாதாரண நஞ்சில்லை. சாஃப்ட்வேர் அப்டேட்கள் போல பூச்சிகள் தங்களின் பரிணாம வளர்ச்சிக்கான சவாலை, ரசாயன அறிவியல் மீது போராகத் தொடுக்கிறது. ரசாயன அறிவியலும், தெளிக்கும் விஷத்தில் புதிய புதிய வெர்ஷன்களை ஸ்மார்ட் போனைப் போல அறிமுகப்படுத்துகிறார்கள். 

இது பூச்சிகளுக்கும், அறிவியலுக்குமான போர் அல்ல. மனித குலத்தின் ஆரோக்கியத்தின் மீது தொடுக்கப்பட்ட போர். இந்த ரசாயனங்கள் பூச்சிக்கொல்லி என்ற நிலையெல்லாம் தாண்டி நரம்பு நஞ்சு என்ற நிலையை அடைந்து ஆண்டுகள் ஆகிறது. எங்கள் ஊரின் அருகில் பெரியூரில், சாயப்பட்டறை கழிவுகளால் நஞ்சாக்கப்பட்ட நிலத்தில் தன் உணவைத் தேடி உண்ட மாடுகளுக்கு இப்பொழுது கேன்சர். மாட்டுக்கு கேன்சர் என்பதை எப்படி நாம் புரிந்து கொள்வது?

மனிதர்களுக்கு என்றால் ஹெரிடிட்டி, டென்ஷன், சிகரெட் பிடித்தீர்கள், தண்ணி அடித்தீர் கள் என்றெல்லாம் காரணம் சொன்னார்கள். மாட்டுக்கு என்ன டென்ஷன்? என்ன ஹெரிடிட்டி? மாடு சிகரெட் பிடித்ததா? தண்ணி அடித்ததா?

அல்சைமர் இப்பொழுது ஜலதோஷம் போல நார்மலாகிக்கொண்டு வருகிறது. நரம்பு நஞ்சுகள் தேனீக்கள் கூடு திரும்புவதை பாதிக்கிறது. அல்சமைர் மக்களும் சொந்த வீடு, மனைவி, மக்களை மறந்துபோகும் அளவிற்கு நரம்பு நஞ்சுகளால் பாதிக்கப்படுகிறார்கள்.

ஆரோக்கியத்தைவிட விலைமதிக்க முடியாத சொத்து என்று எதை நாம் சொல்ல முடியும்?

அடுத்த தலைமுறையை வளர்த்துக்கொண்டிருக்கும் என் போன்ற தாய்மார்களுக்கு இது மிகப் பெரிய செய்தி அக்கா. நேரம் ஒதுக்கி எங்கள் வாசகர்களுக்கு நீங்கள் அளித்த பேட்டிக்கு நன்றி.

என்ன நண்பர்களே, நமக்கான ஒரு கீரையாவது வளர்க்க நாம் ஒரு சபதம் எடுப்போமா?

மாற்றம் நம்மிலிருந்து தொடங்கட்டும்.

எழுத்து : அம்முராகவ்

Happy
Happy
0 %
Sad
Sad
0 %
Excited
Excited
100 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published.

error: Content is protected !!